ရွှေရောင်တောက်ပသောမိသားစုဘဝကိုရရှိပိုင်ဆိုင်နိုင်မည့်အစ္စလာမ့်နည်းစနစ်များ (နောက်ဆုံးပိုင်း)

(၄၁) ဘယ်လိုလုပ်ကြမလဲ 

ကျပ်တည်းရှုပ်ထွေးသော မိသားစုအရေးအခင်းများကြား၌ မွေးဖွားကြီးပြင်းခဲ့ရသော ကလေးသူငယ်တို့အဖို့ ဘယ်မှာလဲ မေတ္တာ အကြင်နာ အယုအယ။ အဲသည်လို မေတ္တာငတ်ခဲ့ရရှာသော ကလေးသူငယ်တို့၏ အနာဂတ်ကို ဘယ်လိုအရောင်တွေဆိုးကြမည်နည်း။ လေလွင့်လူငယ်တို့၏ အခြေခံဇစ်မြစ်ကတော့ မေတ္တာငတ်မွတ်မှုပြဿနာပါပဲ။ အိမ်ခွဲမထားလိုမှု အစွဲအလန်းတစ်ခုမှစ၍ ဆွေစဉ်မျိုးဆက်ကို သေးသိမ်ပျက်စီးစေကြောင်း ဆင်ခြင်သင့်လှပေသည်။ အကောင်းဆုံးအဖြေကတော့ ဘယ်အရာကိုပဲလုပ်လုပ် ဒီးန်ကို ရှေ့မှာထားလုပ်ကြဖို့ပဲဖြစ်ပေသည်။

(၄၂) ခင်ပွန်းသည် ဇနီး၏ ကစားစရာအရုပ်မဟုတ်
ဇနီး၏ မြှောက်ထိုးပင့်ကော်စကားများကြောင့် ခင်ပွန်းဖြစ်သူသည် အိမ်ခွဲနေထိုင်ရေးကို ဒေါသအလျောက် မလုပ်သင့်ပေ။ ချင့်ချိန်ကြံဆရမည်။ ချက်ခြင်းလိုက်လျောခဲ့လျှင် ဇနီးဖြစ်သူက "ငါ့ခင်ပွန်းက ငါပြောရင်ပြီးတာပဲ"ဟု မာနစွဲဝင်သွားနိုင်၏။ အမြဲဤသို့ပင် သွေးဆောင်နေခဲ့သော် ရေရှည်တွင် သားသမီးတို့၏ စာရိတ္တကိုပင် ထိခိုက်ပျက်ပြားစေနိုင်သည်။ ဇနီးတို့၏စိတ်နှလုံးသားသည် မှန်ကန်နေရမည်။ ခင်ပွန်းကို ကစားစရာအရုပ်တစ်ခုလို သဘောမထားသင့်ပေ။

(၄၃) ညီညွတ်ရေး

ခင်ပွန်းဖြစ်သူက အိမ်ခွဲရေးကိုအလိုမတူပြန်သော် ဇနီးက ဤသို့ကြိုးပမ်းအားထုတ်ပြန်သည်။ "ရှင် မိဘအိမ်မှာလည်း မနေဖြစ်၊ အိမ်အသစ်လည်းမရှာနိုင်၊ စိတ်မညစ်ပါနဲ့။ ကျမမိဘအိမ်က ကျယ်တယ်။ ရှင်လည်း အသိသားနဲ့။ ဟိုတုန်းကတည်းက အပါအမာတို့က မှာလိုက်သားပဲ။ အဆင်မပြေရင် အချိန်မရွေးဆင်းခဲ့ဆိုတာလေ။ ရှင်မေ့နေပြီလား။ " စသဖြင့် သူ့မိဘကိုယ့်မိဘ ခွဲခြား၍ပြောလာတော့မည်။

လက်ရှိအခြေအနေက သူမပြောသလောက် နေထိုင်မရသည့် အခြေအနေဆိုးလည်းမဟုတ်။ သူမက ဇွတ်တရွတ်လုပ်နေခဲ့သော် ထိုဇနီးသည် မိသားစုညီညွတ်ရေးကို ဖျက်ဆီးသူပင်ဖြစ်သည်။ အကျယ်အကျယ် မငြိမ်းဖွယ်စကားတို့ကို မဆိုမပြောပဲ ခင်ပွန်းဖြစ်သူက ယုယကြင်နာစွာဖြင့် စိတ်ရှည်ရှည်ထားပြီး ရှင်းပြရမည်။ မိသားစု ညီညွတ်ရေးကို ဦးစားပေးဆွေးနွေးသင့်သည်။

ခင်ပွန်းဆိုသည့်စကားကိုက ခင်မင်တယ်၊ လက်ပွန်းတတီး ခင်မင်ရင်းနှီးသူလို့ အဓိပ္ပါယ်ထွက်သည်။

အဆင်ပြေ ချောချောမွေ့မွေ့နဲ့ အိမ်ခွဲနေခွင့်ရပြီဆိုလျှင်လည်း မိဘများကို အဆက်မဖြတ်ရပေ။ အခါမလပ် ဆက်ဆံလည်ပတ်နေရမည်။ သူ့မိဘ ကိုယ့်ဖက်က ဝတ္တရားကျေပွန်နေရမည်။ နှစ်ဖက်မိဘ၏ ဒုအာကို ယူတတ်ပါစေ။

ဇနီးဖြစ်သူက မိမိ၏မိဘကို ပြုစုယုယတတ်လျှင် မိမိ၏ကျေးဇူးရှင်ဟု မှတ်ယူပါလေ။ အကယ်၍ သူမက ပြုစုယုယမှု မလုပ်သည်ရှိခဲ့သော် အတင်းအကြပ်မခိုင်းပါနှင့်။ ဇနီးက မပြုစုသော်လည်း မိမိ၏မိဘကို မိမိက ပြုစုပါ။ မိဘပြုစုခွင့်ရခြင်းကို နဖူးစာထူးခြင်းတစ်ရပ်ဟု မှတ်ထားပါ။

ဇနီး၏ အုပ်ချုပ်ခံယောက်ျားလည်း မဖြစ်စေနှင့်။ မိန်းမကိုနိုင်သည့် ယောက်ျားလည်းမဖြစ်စေရ။ သိမ်မွေ့စွာ ဆက်ဆံတတ်သူဖြစ်အောင် ကြိုးစားကျင့်ကြံနေထိုင်ရပါမည်။

(၄၄) သလာက်

သလာက်အကြောင်းကို တင်ပြပါမည်။ ဆင်ခြင်ကြရန်ဖြစ်သည်။ နည်းစနစ်သိရန်ဖြစ်သည်။

ယောက်ျားများသည် မိမိတို့၏ဒေါသကို ဖေါ်ထုတ်သောအားဖြင့် သလာက်ကိုသုံးဆွဲကြသည်။ သလာက်သည် နေကာ၏အဆက်ကို ဖြတ်တောက်ခြင်းဖြစ်သည်။ ယင်းလက်နက်သည် အလွန်ဆိုးရွားခါးသီး၏။ ဘယ်လိုမှ မဖြစ်နိုင်တော့သည့်အဆုံး ကွဲကွာကြရမည့်အခြေအနေတွင်(ခွင့်ပြုထားသောလည်း) သလာက်သည် အဆိုးဆုံးလုပ်ရပ်တစ်ခုဖြစ်ကြောင်းကို သိထားရမည်။

သလာက်ပေးရမည့်အချိန်မှာ ဓမ္မတာကုန်ဆုံးပြီး သန့်သောအချိန်ဖြစ်ရမည်။ သဘောမှာ ဇနီးဖြစ်သူနှင့် ပေါင်းသင်းနေထိုင်ပြီးသွားသော် နောက်တစ်လ(သန့်သည့်အချိန်)ကို စောင့်ရမည်။ ဤသို့စောင့်ဆိုင်းရခြင်းမှာ အချင်းချင်းပြေလည်မှုရစေရန်ဖြစ်သည်။

မပေးမဖြစ်သည့် အခြေအနေရောက်လျှင် ယောက်ျားဖြစ်သူက သလာက်တစ်ကြိမ်သာပေးရမည်။ အစ်ဒ်ဒသ်(သုံးလ) ကုန်ဆုံးလျှင် လင်မယားချင်းပြတ်စဲသွားပေမည်။ ဇနီးက ထိုအစ်ဒ်ဒသ်သုံးလအတွင်း အခြေအနေကောင်းလာပါက "သင်မအားပေးထားသော သလာက်ကို ပြန်လည်ရုတ်သိမ်းလိုက်ပြီ" ဟု ပြောလျှင်ပင် နေကာဟ်ဟူသည့် အချိတ်အဆက်မှာ ပြန်ဆက်သွားလေသည်။ (ကွာရှင်းမှုအထမမြောက်တော့ပေ။)

အကယ်၍ အစ်ဒ်ဒသ် သုံးလကုန်ဆုံးပြီးမှ နောင်တရကြလျှင် အတူပြန်လည်ပေါင်းသင်းလိုလျှင် နေကာအသစ်ပြန်ဖတ်ရမည်။

တဖန်လင်မယားချင်း သဘောထား မတိုက်ဆိုင်ပြန်လျှင် လိုက်လျောနားလည်မှုများ ဆောင်ရွက်ရမည်။ ဤအခြေအနေမှ ပြေလည်မှုမရပြန်သေးလျှင် တစ်ကြိမ်သာ သလာက်ပေးရမည်။
ထို့ကြောင့် ယခုထိသလာက်နှစ်ကြိမ်သာ ရှိသေးသည်။ အစ်ဒ်ဒသ်(သုံးလ)အတွင်း ပြန်လည်ပေါင်းသင်းလိုက ရသေးသည်။ ထို(သုံးလ)ကျော်လွန်ပါက နေကာအသစ်ပြန်လည်ဖတ်ရမည်။

တရားတော်က ဤသို့အဆင့်ဆင့်ပြဌာန်းထားခြင်း၏အကြောင်းမှာ နေကာကို ခိုင်မြဲစေလိုသောကြောင့်ပင်ဖြစ်သည်။

နောက်ဆုံး ဘယ်လိုမှ အတူပေါင်းသင်းနေထိုင်၍ မဖြစ်တော့လျှင် တတိယအကြိမ် သလာက်ပေးနိုင်သည်။ ဤတတိယအကြိမ်သည် အပြီးတိုင်ခွဲခွာလိုက်ခြင်းပင်ဖြစ်သည်။ မည်သို့မျှ ပြန်ဆက်လို့ရတော့မည်မဟုတ်ပေ။ နှစ်ဦးနှစ်ဖက်ကျေနပ်နေလျှင်လည်း ပြန်ဆက်ခွင့်မရတော့ပေ။

ယနေ့အချိန်အခါတွင် လူတို့သည် လမ်းခွဲရန်ရှိလျှင် သလာက်သုံးကြိမ်ကို တစ်ပြိုင်တည်းပေးတတ်ကြသည်။ ဤသည်မှာ မှားယွင်းပြီး အပြစ်ထိုက်သောနည်းလမ်းဖြစ်သည်။

(၄၅) ဒေါသမျိုသိပ် စိတ်ရှည်ချိုသာ

ဥပမာ။ ။ ဇနီးက တစိမ်းယောက်ျားတို့၏ဓါတ်ပုံကို စွဲစွဲမြဲမြဲ နေ့စဉ်ကြည့်ပြီဆိုပါစို့။ မကြည့်ရဘူး အပြစ်ရှိတယ်.. စသဖြင့် ပြတ်ပြတ်တောက်တောက်အမိန့်ပေးသလိုမျိုး တားမြစ်ပိတ်ပင်ဆုံးမမည့်အစား အောက်ပါအတိုင်း ချိုသာသောစကားတို့ဖြင့် စိတ်ရှည်လက်ရှည်ပြောသင့်ကြောင်း အကြံပေးလိုပါသည်။

" ဒီနေ့ ကိုယ်မြို့ထဲမှာ ဆိုင်းဘုတ်တစ်ခုတွေ့ခဲ့တယ်။ အရှက်မဲ့ဝတ်စုံနဲ့ပေါ့။ ကိုယ်အဲဒီပုံပေါ် စိတ်ရောက်ခဲ့တယ်။ အာရုံထဲက မထွက်ဘူး။ ဒါ့ကြောင့် ကိုယ့်ဇနီးကို အကြိမ်ကြိမ်သတိရဖြစ်တယ်။ အော်…..ငါ့ဇနီးရှိတာပဲ။ ဒီပုံပေါ်စိတ်ရောက်နေရင်တော့ ငါဖောက်ပြန်ရာရောက်မှာပေါ့။ တော်ပြီ နောက်ဘယ်တော့မှ ဒီလိုပုံမျိုးတွေမကြည့်တော့ဘူးလို့ ဆုံးဖြတ်လိုက်ရတယ်" ဟု ပြောကြည့်ပါ။

ဇနီးက ရုပ်ပုံကြည့်ခြင်း၊ သူစိမ်းယောက်ျားသားများအပေါ် စိတ်ရောက်ခြင်းများကို သူမအလိုလို ပြုပြင်လာစရာ အကြောင်းရှိပါတယ်။ အင်န်ရှာအလ္လာဟ် ။

ဥပမာ။ ။ ဂုံးချောတယ်။ တစ်ယောက်နဲ့တစ်ယောက်ကြား ပြဿနာစကားကို သယ်ဆောင်လာတယ် ဆိုပါစို့။ အဲဒီလိုလူဟာ ဂျန္နသ်မဝင်နိုင်ဘူး။ ဟဒီးစ်တော်မှာ လာရှိတယ်လို့တိုက်ရိုက်ကြီးမပြောပဲ အောက်ပါအတိုင်းပြောကြည့်ရအောင်…..။

လူတွေဟာ တစ်ယောက်အကြောင်းတစ်ယောက် ပြောတတ်တဲ့ဝါသနာရှိတယ်။ အကောင်းပြောတာဆိုရင် ကိစ္စမရှိဘူး။ မကောင်းတဲ့စကားပြောခဲ့ရင် ကြားတဲ့သူက တစ်ဆင့်ပြန်ပြောရင် မူလစကားထက် ချဲ့ကားပြောရော။ ကာယကံရှင်က ဒေါသဖြစ်။ ဒီတော့ တစ်ယောက်နဲ့တစ်ယောက် စိတ်ဝမ်းကွဲ၊ အထင်အမြင်လွဲ၊ ဆဲဆို ကြိမ်းမောင်း၊ ထုရိုက် ထိုးကြိတ်၊ ပြဿနာမျိုးစုံတတ်ကြ၊ မွတ်စ်လင်မ်အချင်းချင်း မညီညွတ်ကြတော့ဘူး။ အဲဒီတော့ ကြားစကားသယ်ဆောင်တဲ့သူက ဘယ်မျက်နှာနဲ့ အဲဒီလူနှစ်ဦးကြားမှာ နေတော့မလဲ။ ဒါ့ကြောင့် အတင်းအဖျင်းပြောတဲ့ဓလေ့၊ ဂုံးချောတတ်တဲ့ဓလေ့တွေကို တို့မွတ်စ်လင်မ်တိုင်း ပြုပြင်ရမယ်၊ ဆင်ခြင်ရမယ် ဟု ပြောပြလျှင် ဇနီးက ကျေနပ်သဘောကျမယ်။ သူမမှာ အဲလို အမူအကျင့်ရှိခဲ့လျှင် ပြင်ဆင်လာနိုင်ကောင်းပါသည်။ အလ္လာဟ်အရှင်ထိန်းသိမ်းတော်မူပါစေ။

လင်နှင့်မယား လျှာနှင့်သွား ဟူသည့်စကားရှိသည်။ မတော်တဆ ထိခိုက်ရန်ဖြစ်တတ်ကြသည်။ သို့သော် ဒေါသမြိုသိပ် စိတ်ရှည်သည်းခံမှုကို ကျင့်သုံးရမည်။ အဘယ့်ကြောင့်ဆိုသော် မိမိတို့၏ သားသမီးများအရှေ့တွင် ရုန့်ရင့်ကြမ်းတမ်းသော အပြောအဆိုများ မဖြစ်ပေါ်စေရန်ဖြစ်သည်။ နှလုံးသား နုနယ်၊ ငယ်နုသောအချိန်၊ သေးသိမ်သောပညာဖြင့် မစဉ်းစားနိုင်သေး၊ ဆင်ခြင်နိုင်အားသေးသော ကလေးငယ်တို့၏ စိတ်ပိုင်းဆိုင်ရာ ထိခိုက်မနစ်နာသွားစေရန်ဖြစ်သည်။

အိမ်ဝင်အိမ်ထွက် ဒုအာများကို မမေ့မလျော့ရွတ်ဆိုရမည်။ အိမ်အတွင်း စွန္နသ်တော်များ ရှင်သန်စေရန် ကြိုးပမ်းကြရပါမည်။ ရှိုက်သွာန်အတွက် နေရာထိုင်ခင်းမရှိတော့လျှင် မိသားစုအတွက် ပြဿနာအရပ်ရပ် ကင်းစင်သွားနိုင်ပေသည်။

(၄၆) ဆုံးမပုံတစ်မျိုး

ခင်ပွန်းဖြစ်သူယောက်ျားသားတို့ ပညာမဲ့မဖြစ်သင့်ပါ။ မေ့လျော့ပေါ့ပျက်ခြင်းများ မရှိသင့်ပါ။ လူကြီးမိဘတို့သည် ဆဲရေးတိုင်းထွာခြင်းကိစ္စမျိုးကို ရှောင်ကြဉ်ရမည်။ တို့တတွေ ကိုယ်တော်မြတ်ရဲ့အွမ္မသ်ဖြစ်တယ်။ တို့သားသမီးတွေကို အွမ္မသ်အရေအတွက်များစွာထဲမှာ အလ္လာဟ်က ချီးမြှင့်ထည့်သွင်းထားတယ်။ သူမွန်သူမြတ်လေးတွေဖြစ်အောင် မြေတောင်မြှောက်ပေးရမယ်။ အညွန့်မကျိုးစေရဘူး ဟု ဇနီးအား နားချနိုင်သည့် အရည်အချင်းရှိရပေမည်။

(၄၇) မိဘမေတ္တာမရခဲ့သောကလေး
သားသမီးနှင့် မိခင်တို့၏ အပြန်အလှန်မချေမငံစကားတွေ ကြားခဲ့သည်ရှိသော် ချက်ခြင်းအသင်က ဝင်ရောက်မဖြေရှင်းသေးပါနှင့်။ အကျိုးအကြောင်းကို သိအောင်လေ့လာပါ။ ပြီးနောက်မှာ အေးချမ်းစွာပြောဆိုရှင်းလင်းပေးရမည်။

သားသမီးတို့၏ရှေ့၌ ဇနီးအား အော်ဟစ်ကြိမ်းမောင်းခြင်း၊ ရိုက်နှက်ခြင်းများ မဖြစ်ပါစေနှင့်။ ဒေါသဖြစ်ခဲ့လျှင် အပြင်သို့ထွက်သွားလိုက်ပါ။ အဘယ်ကြောင့်ဆိုသော် ကလေးငယ်တို့၏ အသိအာရုံသည် ဓာတ်ပုံရိုက်သည်ထက် ပိုပြီးမှတ်နိုင်စွမ်းရှိသည်။ ၎င်းတို့၏ နှလုံးသား၌ ပုံရိပ်ထင် စွဲကပ်စေနိုင်သောကြောင့်ဖြစ်သည်။ ဓလေ့စရိုက်ကြမ်းများအကြား ကြီးပြင်းခဲ့သောကလေးငယ်တို့၏ အနာဂါတ်သည် စိတ်ပျော်ရွှင်မှု ဆိတ်သုန်းတတ်၏။ မိဘ၏ယုယမှုမဲ့ခဲ့သော ကလေးသူငယ်တို့၏ ဘဝသည် လှည့်ဖျားတတ်သူ၏ ကျော့ကွင်းသို့ ဇွတ်နင်းဝင်တတ်ပေသည်။ မိမိတို့ဇနီးမောင်နှံ၏ ပြောဆို ပြုမူဆောင်ရွက်ချက်တိုင်းသည် ကလေးငယ်များအတွက် အဓိကကျကြောင်း ဆင်ခြင်သင့်သည်။

(၄၈) နားချသင့်

ဇနီးဖြစ်သူက သားသမီးကို ဒေါသဖြစ်လျှက် ဆူပူကြိမ်းမောင်း ပြောဆိုမှုမျိုးပြုခဲ့သည်ရှိသော် အချိန်ယူ၍ နားချရမည်။ ဥပမာ ဒီနေ့ လမ်းထဲကလာတော့ ကလေးတွေဆဲဆိုနေသံကြားရတယ်။ စိတ်မကောင်းဘူး။ ဒါနဲ့အနီးအနားက မိတ်ဆွေကိုပြောဖြစ်တယ်။ မိတ်ဆွေက ကိုယ့်ကိုပြန်ပြောတယ်။ အဲဒီကလေးတွေရဲ့မိဘတွေက အမြဲဆဲဆိုနေကြသူတွေပေါ့။ ဒါ့ကြောင့် ဒီကလေးတွေ ဆဲဆိုတတ်တာ မဆန်းပါဘူးတဲ့။ သူတို့အိမ်မှာ အဆဲသင်တန်းရှိနေတယ်….လို့ ပြောတယ်။ စသဖြင့် သိုင်းဝိုင်းပြောဆိုကြည့်စေချင်သည်။ အင်န်ရှာအလ္လာဟ် ဇနီးဖြစ်သူ သတိထားဆင်ခြင်လာပါလိမ့်မည်။

ဇနီးကောင်းတို့မည်သည် မိမိခင်ပွန်းကိုတောင်းပန်တတ်ရမည်။ ဝတ္တရားပျက်ကွက်မှုများရှိခဲ့သော် ခွင့်လွှတ်ဖို့ ပြောဆိုသည့်အကျင့် မွေးမြူသင့်သည်။ အဘယ့်ကြောင့်ဆိုသော် ယောက်ျားခွင့်လွှတ်ကျေနပ်နေခိုက် ဇနီးကွယ်လွန်လျှင် ထိုဇနီးသည် ဂျန္နသ်သို့ ဝင်ရပေမည်။

(ဟဒီးစ်တော်ဖြစ်သည်။)

ဇနီးဖြစ်သူတို့သည် ဘာပဲဖြစ်ဖြစ်၊ ဘာပဲလိုအပ်လိုအပ်၊ အလ္လာဟ်ကိုသာအားကိုးရမည်။ အလ္လာဟ်ထံ၌သာ တောင်းခံသင့်သည်။ အလ္လာဟ်သည် အရာရာကို ဖြစ်စေတော်မူသော အရှင်ဖြစ်သည်။ အရာရာကို စိုးပိုင်တော်မူသောအရှင်ဖြစ်သည်။ အို….အလ္လာဟ်အရှင် အစ္စလာမ်သာသနာဝင် မွတ်စ်လင်မ်အိမ်ထောင်သည်တိုင်းအား ကောင်းသောအကျင့်အကြံများချီးမြှင့်တော်မူပါ။ ဒွန္နယာအာခေရသ် နှစ်ဌာနစလုံး အေးချမ်းသာယာချမ်းမြေ့မှု ချီးမြှင့်တော်မူပါ…………အာမီးန်။

(မော်လာနာအဗ္ဗဒွလ်ကာဒိရ်ဆွာဟိဗ် ရေးသားပြုစုတော်မူအပ်သော " စံပြမိဘနှင့် ချစ်သားလက်ဆောင် " စာအုပ်မှကောက်နှုတ်တင်ပြသည်။)

အလ်မုဖီးဒ်

Website:        http://aaitee.blogspot.com

Facebook:      http://www.facebook.com/almufeed.mm

Email:           haroonrangoni@gmail.com

google တွင်ရှာရန် “ အလ်မုဖီးဒ် ” ဟု မြန်မာလိုရိုက်၍ရှာပါ။

မိမိဖုန်းထဲတွင် ပြန်လည်ဖတ်ရှုရန် သိမ်းထားလိုပါက Simple Islam.apk ဖိုင်ကို ဒေါင်းလုတ်ဆွဲပြီး Install လုပ်ထားပါ။