ရာသီမလာရန် ဆေးသုံးပြီး ရိုဇဟ်ထားခြင်းဆိုင်ရာ ပညတ်ချက်

ယနေ့အခါတွင် မွတ်စ်လင်မ်အမျိုးသမီးအများစုတို့အတွင်း၌ ရာသီမလာရန် ဆေးများသုံးပြီး ရမဿွာန်လ၏ ရိုဇဟ်ထားခြင်း၊ ညထူးညမြတ်များရောက်လျှင် ရာသီရပ်သွားရန် လုပ်ဆောင်ခြင်းများကို ကြားသိနေရသည်။ ယင်းသို့ လုပ်ဆောင်ခွင့် ရှိမရှိကိုလည်း မေးမြန်းနေသည်များအား တွေ့နေရသည်။ ထိုကိစ္စနှင့်ပတ်သက်၍ အမျိုးသမီးအားလုံး အသိတရားအမှန်ရစေရန် အလ်မုဖီးဒ်ကနေ တင်ဆက်လိုက်ခြင်း ဖြစ်သည်။

ကုသိုလ်(စဝါးဗ်)ဟူသည် ရှရီအသ်က သတ်မှတ်ထားသည့်အတိုင်း လိုက်နာခြင်းတွင်သာ ရှိကြောင်း မွတ်စ်လင်မ်အမျိုးသမီးတို့ အဓိက သိထားရပါမည်။ ရာသီလာခြင်းဟူသည် အလ္လာဟ်အရှင်မြတ်က အမျိုးသမီးတိုင်းအတွက် သတ်မှတ်ထားသည့် သဘာဝဖြစ်စဉ်တခုမျှသာဖြစ်၏။ အစ္စလာမ်တွင် ရာသီလာနေသည့် အမျိုးသမီးအား သန့်နေသည့် အမျိုးသမီးနည်းတူ အခွင့်အရေးများ ပေးထားသည်။ ထို့အတူ အချို့အချို့သော တာဝန်များအား ပလပ်ပေးထားသည်။ ဤသည်မှာ အလ္လာဟ်အရှင်မြတ်က လူသားများထဲမှ မွတ်စ်လင်မ် အမျိုးသမီးတို့ကိုသာ အထူးပေးထားသည့် အခွင့်အရေးဖြစ်သည်။ အကယ်၍သာ ရာသီလာခြင်းကို တားပြီး ရိုဇဟ်ထားဖို့ရန် လိုအပ်ခဲ့မည်ဆိုပါက ရမဿွာန်ဟူသည် တစ်နှစ်တွင် တလသာ တာဝန်ရှိသည့် ဖရ်ဇ်ဖြစ်သည်။ နေ့တိုင်း တနေ့ကို ငါးကြိမ် နမားဇ်ဖတ်ရန် ဖရ်ဇ်ကို လတိုင်း ကြုံတွေ့နေရသည်။ နမားဇ်သည် ရိုဇဟ်ထက်ပို၍ ကြုံနေရသည့် ဖရ်ဇ်တာဝန်ဖြစ်၏။ ထိုတာဝန်ကို မလစ်ဟင်းစေဘဲ ဆောက်တည်ဖို့ရာ တစ်နှစ်တခါထက် လတိုင်း လတိုင်းက ပို၍ အရေးကြီးပါမည်။ ထို့ကြောင့် လတိုင်းတွင် အနည်းဆုံး ငါးရက် ခုနှစ်ရက် နမားဇ်မဖတ်ရခြင်းအတွက် ဆေးသောက်ပြီး ရာသီမလာအောင်လုပ်ပြီး နမားဇ်ဖတ်ရန် သတ်မှတ်ရပါလိမ့်မည်။ ရှရီအသ်တွင် ထိုသို့မသတ်မှတ်ထားပါ။ ရှရီအသ် စတင်ရာ တမန်တော်မြတ်ရှိစဉ်မှစ၍ မည်သည့် ဆွဟာဗီအမျိုးသမီးကမျှ ရာသီလာခြင်းကို တားဆီးပြီး ရိုဇဟ်စောင့်ခဲ့သည်ဟူ၍ မရှိပါ။ (ဤစကားပြောလို့ အရင်က အဲ့ဒီလို ဆေးမှမရှိတာဟု စောဒကမတတ်ပါနှင့်။ ယနေ့ခေတ်၏ ခေတ်သစ်ပစ္စည်းအားလုံးသည် ယခင်ကာလကတည်းက ရှိပြီးသားများသာ ဖြစ်သည်။) တစ်နှစ်တခါ ကြုံရသည့် ဖရ်ဇ်အတွက်လည်း ဆေးများသုံးပြီး ရိုဇဟ်ထားဖို့ တာဝန်မရှိသလို နဖိလ်အိဗာဒသ်အတွက်လည်း ရာသီလာနေခြင်းအား တားဆီးခြင်း၊ ရပ်တန့်စေခြင်း လုံးဝမပြုရပါ။ ရာသီလာခြင်းကို တားပြီး အိဗာဒသ်လုပ်မည်၊ ရိုဇဟ်ထားမည် စသည့် ခံယူချက်များရှိပါက ဖျက်ပါ။ အိဗာဒသ်သည် နမားဇ်တခုတည်း ရှိသည်မဟုတ်ပါ။ ထို့အတူ ဆေးသောက်ပြီး ရိုဇဟ်ထားဖို့ အစ္စလာမ်က မစေခိုင်းထားပါ။ ရှရီအသ်၏ လွယ်ကူမှုကို လွယ်ကူမှုအတိုင်းထားပါ။ မခက်ခဲစေပါနှင့်။ ယင်းသို့ ဆေးသောက်၍ ရာသီရပ်ဆိုင်းစေခြင်းနှင့်ပတ်သက်သည့် ပညတ်ချက်ကို ပြန်လည် ဖော်ပြလိုက်ပါသည်။ မသိသူများလည်း သိသွားအောင်၊ သိပြီးသားများလည်း ပိုမှတ်မိအောင်၊ မိမိ၏ မိတ်ဆွေများတွင် ထိုသို့ ခံယူချက်များ ရှိနေပါက အမှန်ကို ပြောပြနိုင်အောင် ရည်ရွယ်ပါသည်။ (အလ်မုဖီးဒ်)

ဓမ္မတာဆိုင်းငံ့ခြင်း
ရမ်ဇာန်လနှင့် အခြားသောထွတ်မြတ်သည့် နေ့များအတွက် ဆေးသောက်၍ ဓမ္မတာဆိုင်းငံ့ခြင်း

မေး - အမျိုးသမီးများအနေဖြင့် ရမ်ဇာန်လ၏ ရိုဇာဟ်အတွက်ဖြစ်စေ၊ အခြားသော နေ့ထူးနေ့မြတ်တို့တွင် နမားဇ်၊ သိလာဝသ်များ ပြုနိုင်ရန်အတွက် လစဉ်ဓမ္မတာဆင်းခြင်းကို ဆိုင်းငံ့ရန်အတွက် ဆေးများသုံးစွဲခွင့်ရှိပါသလား။ အစ္စလာမ့်လမ်းညွှန်မှုကို သိရှိလိုပါသည်။

ဖြေ - အထက်ပါပုံစံ ဆေးသုံးစွဲ၍ရိုဇာဟ်ထားခြင်းဖြင့် ရိုဇာဟ်ပိုင်သွားမည်။ သို့သော် အစ္စလာမ့်က တောင်းဆိုထားခြင်းမရှိပါ။ ဆေးပညာအရ အချို့ဆိုးကျိုးများရှိသည်ဟု ဆရာဝန်များက ဆိုကြသည်။ ထို့ကြောင့် ရှောင်ကြဉ်ခြင်းက ပိုကောင်း၏။

မှတ်ချက်။ နားလည်မှုမှားနေကြသော အကြောင်းအရာတစ်ခုမှာ "ဆေးသုံးစွဲ၍ ရိုဇာထားလိုက်ခြင်းက (ရိုဇာကို ခဏရပ်ဆိုင်းလိုက်ပြီး) ကဇွာဖြည့်ရခြင်းထက် ပိုမွန်မြတ်သည်" ဟူသည့် နားလည်ယူဆမှု ဖြစ်သည်။ ထိုနားလည်ယူဆထားမှုသည် လုံးဝမှား၏။ အမှန်မှာ ......ဆေးသုံးပြီး ရိုဇာထားလိုက်ခြင်းဖြင့် စဝါးဗ် အကျိုးကုသိုလ်တွင် တစက်ကလေးမှ ပိုမရသွားသလို ဆေးမသုံးဘဲ ကဇွာလုပ်လိုက်လျှင်လည်း အကျိုးစဝါးဗ်တွင် လုံးဝလျော့နည်းမည် မဟုတ်ပေ။
{ ကြည့် ကေသာဗွလ် ဖသာဝါကျမ်း}

ကုရ်အာန်ကျမ်းတော်မြတ် (နှစ်ပါရဟ်မှ အာယသ်တော် (ယိုရီးဒွတ်လ်လားဟို့ ဗေ့ကိုမွလ် ယွတ်စ်ရ ဝလာယိုရီးဒို့ ဗေ့ကိုမွတ်လ် အွတ်စ်ရ) အဓိပ္ပါယ် အလ္လာဟ်အရှင်မြတ်သည် အသင်တို့ထံမှ လွယ်ကူမှုကိုလိုလားပြီး ခက်ခဲမှုကို မလိုလားပေ။ ဟု မိန့်ဆိုထားတော်မူပါသည်။

ရေးသားသူ >> Abu onaiyeis

~ အလ်မုဖီးဒ် ~
ဟစ်ဂ်ျရီ ၁၄၃၆/ ရှအ်ဗာန်/ ၁၅/ ယောင်မုလ်အရ်ဗာအ်


ရာသီမလာစေရန် ဆေးသောက်တားခြင်း၏ အကျိုးဆက်ကို ဆေးပညာရှုထောင့်မှ ဖော်ပြထားခြင်း

ရာသီမလာရန် ဆေးသောက် တားခြင်း
ယခုခေတ် အမျိုးသမီးအများစုတို့သည် ရမဿွာန်လတွင် ရိုဇာကဇွာမဖြစ်ရန်နှင့် ကဒရ်ညမြတ် (အခြားသော နေ့ထူးနေ့မြတ်များ)တွင် အိဗာဒသ်များပြုလုပ်နိုင်ရန်ဟု ရည်ရွယ်၍ ဓမ္မတာမဆင်းစေရန် တားဆေးများ သုံးစွဲကြသည်။ ထိုလုပ်ရပ်သည် လုံးဝမှားယွင်းပြီး ကျန်းမာရေးကိုလည်း ထိခိုက်စေနိုင်သည်။ ဦးစွာပထမကျန်းမာရေးထိခိုက်စေသော အကြောင်းရာများအား တင်ပြပါမည်။ ထိုးဆေးများသုံးစွဲပါက ကိုယ်အလေးချိန် တက်လာမည်။ နောက်ပိုင်းတွင် ရာသီပုံမမှန်ခြင်း ဖြစ်လာနိုင်သည်။ ခေါင်းကိုက်ဝေဒနာရှင်များ သုံးစွဲပါက ရောဂါအခြေနေ ပိုဆိုးရွားသွားနိုင်သည်။ခန္ဓာကိုယ်တွင် ရေဓါတ်များလာမည်။ စိတ်ဝေဒနာရှင်များ လုံးဝမသုံးစွဲသင့်ပါ။ သောက်ဆေးကိုလည်း မလိုအပ်ပါက မသုံးစွဲသင့်ပါ။ (ဤအချက်အား D.R Aishah Rayaan(Dubai) က ပြောပြခြင်း ဖြစ်သည်။)

ယခု အစ္စလာမ့်အမိန့်ကို တင်ပြပါမည်။

အစ္စလာမ်သည် လူသား၏ ကျန်းမာရေးကို ဦးစားပေး ထောက်ထားမှုရှိသော ဘာသာတစ်ခု ဖြစ်သည်။ အလ္လာဟ်အရှင်မြတ်သည် လူသားများအား မနိုင်ဝန် မထမ်းခိုင်းပါ။ လူသားများ လုပ်နိုင်သော အီဗာဒသ်များကိုသာ လုပ်ရန် ဖရဇ်တာဝန် အဖြစ် ပြဋ္ဌာန်းပေးထားသည်။ ကုရ်အာန်ကျမ်းမြတ်တွင် အလ္လာဟ်အရှင်မြတ်က "လာ ယုကလ် လိဖုလ်လာဟု နဖ်ဆန်၊ အိလ်လာ ဝုဆ်အဟာ" အလ္လာဟ်အရှင်မြတ်သည် လူသားအား ၄င်းတတ်နိုင်သည်ခန့်သာ တာဝန်ပေးတော်မူ၏ ဟု မိန့်တော်မူထားသည်။ မိမိကိုယ်ခန္ဓာအား အဓမ္မစေခိုင်း၍ ဒုက္ခရောက်အောင် ပြုလုပ်ခြင်းကို တမန်တော်မြတ် ကိုယ်တိုင် တားထားတော်မူ၏။ ဆွဟာဗီအမျိုးသမီးတစ်ဦးသည် သဟဂ်ျဂျွဒ်အချိန် အိပ်မငိုက်စေရန် မိမိ၏ဆံပင်အား တိုင်ဖြင့်ချည်ထားကြောင်း တမန်တော်မြတ် သိသောအခါ ထိုသို့မလုပ်ရန် တားမြစ်လိုက်၏။ ထိုနည်းတူ ဆွဟာဗဟ်တစ်ပါးသည် နေ့စဉ်ရက်ဆက် ရိုဇာထား၍ ညစဉ်ညတိုင်း နမားဇ်ဝတ်ပြု၍နေသည်။ တမန်တော်မြတ်သည် ထိုဆွဟာဗဟ်အားလည်း တားမြစ်ခဲ့သည်။ ဖေါ်ပြခဲ့သော ကုရ်အာန်အာယသ်နှင့် ဟဒီးစ်တော်များအရ အမျိုးသမီးတို့သည် ရမဿွာန်ရိုဇာ မပျက်စေရန်နှင့် ညထူးညမြတ်များတွင် အိဗာဒသ်လုပ်ရန်ရည်ရွယ်၍ တားဆေးများ သုံးစွဲခြင်းသည်လည်း မပြုလုပ်ရမည့်အရာဖြစ်ကြောင်း သုံးသပ်ရပါသည်။ လုံးဝမပိုင်၊ ဟရာမ်ဟု ဆိုလိုခြင်းမဟုတ်။

ယင်းကဲ့သို့ ပြုလုပ်ခြင်းတွင် ပုံစံနှစ်မျိုးရှိသည်။
(၁) ရာသီသွေး မပေါ်ခင်ကတည်းကပင် ကြိုတင် ဆေးသုံးစွဲကာ သွေးမပေါ်အောင် တားဆီးခြင်း။
(၂) ရာသီသွေးပေါ်ပြီးကာမှ ဆေးသုံးစွဲ၍ ရပ်တန့်စေခြင်း။ ပထမပုံစံမှာ သွေး လုံးဝပေါ်ခြင်းမရှိသည့်အတွက် ပိုင် သွားမည်။ ဒုတိယပုံစံမှာ သွေးပေါ်ပြီးကာမှ ရပ်တန့်စေသည့်အတွက် အမြဲသွေးပေါ်လေ့ရှိသော ရက်များ၏ နမားဇ်၊ ရိုဇာဟ်များ မပိုင်ပါ။ ထိုနေ့များ၏ ရိုဇာဟ်တို့အား ပြန်လည်ဖြည့်စွက်ရန် ဝါဂျိဗ်ဖြစ်သည်။ သဘာဝအား လွန်ဆန်ပြီး မိမိကျန်းမာရေးအား ထိခိုက်စေနိုင်သော နည်းလမ်းများအား သုံးစွဲ၍ တာဝန်ထမ်းဆောင်ခြင်းသည် မည်သို့မှအကျိုးမရှိပါ။ (ထိုသို့ပြုလုပ်ရန်လည်း အမိန့်မပေးထားပါ။ ထို့အတူ ယင်းသို့ ဖြစ်ပေါ်နေကြအရာအား တားဆီးပြီး အိဗာဒသ်ပြုလုပ်လျှင် ပိုမြတ်၏ဟုလည်း မိန့်ထားခြင်းမျိုးမရှိပါ။ အရှိအတိုင်းသာ အမိန့်နာခံရန် ခိုင်းထားခြင်း ဖြစ်၏။) ထို့ကြောင့် သဘာဝအတိုင်းပင် ဖြစ်လေ့ရှိတတ်သော ရာသီလာခြင်းအား မတားဆီးဘဲ အမလ်အိဗာဒသ်များ ပြုလုပ်ပါရန် တိုက်တွန်းအပ်ပါသည်။

အမျိုးသမီးတို့အတွက် ရိုဇဟ်ဆိုင်ရာ အသိပညာများအား ဤလင့်တွင် ဖတ်နိုင်ပါသည်။
http://aaitee.blogspot.com/2016/06/blog-post_12.html

အလ်မုဖီးဒ်
ရှအ်ဗာန်လ/၉/ ဟိဂ်ျရီ 1438 (ယောင်မုစ်စဗ်သိ)
6/5/2017(စနေနေ့)