Monday, May 23, 2016

ရိုဇဟ်မထားသူဖြင့် ရိုဇဟ်ထားသူက မဂ်ဖိရသ်ရခြင်း



ဟဇရသ်အွမ်မေ့အုမရဟ်သခင်မထံမှ ဆင့်ပြန်ချက်လာရှိသည်။ သခင်မက အကြောင်းတစ်ရပ်ကို ပြောပြခဲ့သည်မှာ တစ်ခါက တမန်တော်မြတ်သည် ကျွန်မထံသို့ အလည်အပတ် ကြွမြန်းလာခဲ့သည်။ ထို့ကြောင့် ကျွန်မက စားသောက်ဖွယ်ရာတို့ဖြင့် ဧည့်ခံ၏။ တမန်တော်က အသင်မလည်း လာစားလှည့်ပါဟု ဖိတ်ခေါ်လေသည်။ ထိုအခါ ကျွန်မက အို တမန်တော် ကျွန်မ ရိုဇဟ်စောင့်ထိန်းထားပါသည်ဟု လျှောက်ထားသည်။ ထိုအခါ တမန်တော်မြတ်က ရိုဇဟ်စောင့်ထိန်းသူအနီး စားသောက်ပါက ကောင်းကင်တမန်တို့သည် စားသောက်သူ ပြီးသည်အထိ ရိုဇဟ်ထားသူအတွက် မဂ်ဖိရသ်ရရန် ဆုတောင်းပေးနေကြ၏ ဟု မိန့်တော်မူပေသည်။ အထက်ပါဟဒီးစ်ကို အဟ်မဒ်ကျမ်း၊ သိရ်မီဇီကျမ်းတို့တွင် ဆင့်ပြန်ထားပြီး မိရ်ှကားသ်တွင်လည်း ဖော်ပြထားပါသည်။

ဤဟဒီးစ်ကို ဖော်ပြရခြင်း၏ ရည်ရွယ်ချက်မှာ ရိုဇဟ်စောင့်ထိန်းထားသူ တစ်ဦးဦးရှေ့တွင် နောက်တစ်ယောက်က စားသောက်ပါက မကောင်းဖြစ်သည်။ အားနားစရာ၊ သို့မဟုတ် မားအ့်ဖ်ပြုပါ စသည့်ခံယူချက်အချို့ မွတ်စ်လင်မ်အများစုအတွင်း ရှိကြပါသည်။ အမှန်ရှိသည်မှာ ထိုသို့မဟုတ်ပါ။ ရိုဇဟ်ထားသူအနီး မထားသူက စားသောက်ဖြစ်ပါက ယင်းစားသောက်နေသူ၏ အကြောင်းခံဖြင့် ကောင်းကင်တမန်တို့၏ မဂ်ဖိရသ် လွတ်ငြိမ်းချမ်းသာခွင့် ပန်ကြားပေးခြင်းကို အနီးရှိ ရိုဇဟ်စောင့်ထိန်းသူက ရရှိပေသည်။ ထို့ကြောင့် ရှိရင်းစွဲခံယူချက်မှ ရှရီအသ်၏ သင်ပြမှုသို့ ပြောင်းလဲခံယူနိုင်ရန် ရည်ရွယ်ပါသည်။

ဤသို့ စားသောက်နေသူကြောင့် တစ်ဖက်က ရိုဇဟ်ထားသူ မဂ်ဖိရသ်ရသည်ဟု ဆိုလိုက်ခြင်းဖြင့် တမင်သကာ လိုက်လံစားပြနေခြင်း၊ ရိုဇဟ်ထားသူများအား အစားအသောက်ပုံများဖြင့် ပွဲခံခြင်းများ ပြုခိုင်းခြင်း မဟုတ်ပါ။ ထို့အတူ ရမဿွာန်လမြတ်တွင် လူတကာရှေ့ ပေါ်ပေါ်တင်တင် ရမဿွာန်လမြတ်ကို ဂရုမစိုက်သည့်ပုံဖြင့် စားသောက်ခိုင်းသည်လည်း မဟုတ်ပါ။ အခြေအနေအရ ရိုဇဟ်ထားသူရှေ့တွင် စားသောက်ဖြစ်ပါက အားနားစရာမဟုတ်ကြောင်း ယင်းသို့စားသောက်ဖြစ်သွားခြင်းဖြင့် ရိုဇဟ်ထားသူအတွက် ကောင်းကင်တမန်တို့၏ မဂ်ဖိရသ်ပါ ရရှိကြောင်း သိရှိနိုင်ရန် ဖြစ်ပါသည်။ ထို့ကြောင့် ကျွန်ုပ်တုိ့အနေဖြင့် အခြေအနေအရ ရိုဇဟ်ထားသူနှင့် မထားသူတို့ တွေ့ဆုံဖြစ်ပြီး စားသောက်ကြပါကလည်း မည်သို့မှ အားနားစရာမရှိဘဲ ရိုဇဟ်ထားသူကလည်း အနားတွင်ရှိနေကာ မဂ်ဖိရသ်ကို ရယူနိုင်ပါကြောင်း အသိတစ်ခု လက်ဆောင်ပါးလိုက်ပါသည်။