မြန်မာနိုင်ငံတွင် ၉/၃/၂၀၁၆ အင်္ဂါနေ့တွင် နေကြတ်ခြင်း ဖြစ်စဉ်ကို တွေ့မြင်ရမည်ဟု ကြေငြာထားသည်ကို ဖတ်ရှုလိုက်ရပါသည်။ နေကြတ်လျှင် အစ္စလာမ်က ဘာလုပ်ခိုင်းထားသနည်းကို အများမွတ်စ်လင်မ် သိစေလိုသည့်ဆန္ဒ ဖြစ်ပေါ်လာသဖြင့် သိမှတ်ထားသမျှလေးကို စုစည်း၍ အလ်မုဖီးဒ်၏ စာဖတ်ပရိတ်သတ်ရှေ့ဝယ် ရေးသား တင်ဆက်လိုက်ပါသည်။ မွတ်စ်လင်မ်တို့အနေဖြင့် ထိုအကြောင်းအရာကို ဖတ်ရှုပြီးနောက် လက်တွေ့အကောင်အထည်ဖော် ကျင့်သုံးကြပါမည်ဟုလည်း မျှော်လင့်အပ်ပါသည်။
နေကြတ်ခြင်းကို အရဗီဘာသာဖြင့် ကုဆူးဖ် (ကားဖ်(အကြီး)၊ ဆီးန်၊ ဝေါင်၊ ဖှာ) ဟု ခေါ်ဆိုသည်။ ကုဆူးဖ်၏ အဘိဓာန်အဓိပ္ပါယ်မှာ အလင်းရောင် ကင်းမဲ့သွားခြင်း ဟု ဖြစ်သည်။ အများအသုံးအနှုန်းတွင် နေကြတ်ခြင်းကို ခေါ်ဆိုပေသည်။
လကြတ်ခြင်းကို ခုဆူးဖ် (ခါ၊ ဆီးန်၊ ဝေါင်၊ ဖှာ) ဟုခေါ်ဆိုပြီး အဘိဓာန်အဓိပ္ပါယ်မှာ ဆုံးရှုံးခြင်းဟု ဖြစ်သည်။ အများသုံးတွင် လကြတ်ခြင်းကို ခေါ်ဆိုသည်။
နေကြတ်ချိန် နမားဇ်ဆောက်တည်ခြင်း
နေကြတ်ချိန် ဂျမာအသ်ဖြင့် နမားဇ်ဆောက်တည်ခြင်းသည် အိမာမ်အားလုံးထံတွင် အဆိုတညီတည်း ဖြစ်ပေသည်။ အိမာမ်ကြီးလေးပါးထံတွင် နေကြတ်ချိန် နမားဇ်ဆောက်တည်ခြင်းသည် စွန္နသေမုအပ်က်ကဒဟ် ဖြစ်၏။
တမန်တော်မြတ် ဆွလ္လလ္လားဟုအလိုင်းဟိဝစလ္လမ် ရှိချိန်တွင် နေကြတ်၊ လကြတ်ခဲ့ခြင်း
တမန်တော်မြတ် ဆွလ္လလ္လားဟုအလိုင်းဟိဝစလ္လမ် ရှိစဉ်ကာလ ဟစ်ဂျရီ ငါးခုနှစ်တွင် ပထအကြိမ် နေကြတ်ခဲ့သည်။ ဒုတိယအကြိမ်သည် တမန်တော်မြတ်၏ သားလေး အိဗ်ရာဟီးမ် ကွယ်လွန်ချိန်တွင် ဖြစ်၏။ ထိုဒုတိယအကြိမ်သည် ဟစ်ဂျရီ ဆယ်ခုနှစ်တွင် ဖြစ်သည်ဟု အဆိုကျော်ကြားပေသည်။
ဟစ်ဂျရီ လေးခုနှစ်၊ ဂျမာဒွလ်အွခ်ရာလတွင် လကြတ်ခြင်း ဖြစ်ပေါ်ခဲ့သည်။
နေကြတ်၊ လကြတ်ချိန် မွတ်စ်လင်မ်တို့ ပြုလုပ်ရမည့်အရာ
နေကြတ် လကြတ်ခြင်း ဖြစ်ပေါ်နေချိန် မွတ်စ်လင်မ်တို့ ဘာလုပ်ရမည်ကို အစ္စလာမ်ကို ယူဆောင်လာသည့် မြတ်နဗီ ဆွလ္လလ္လာဟုအလိုင်းဟိ ဝစလ္လမ်က ကျင့်သုံး လုပ်ဆောင်ပြခဲ့ပေသည်။ ထိုလုပ်ဆောင်ချက်ကိုပင် မွတ်စ်လင်မ်များ ကျင့်သုံးရပါမည်။ အစ္စလာမ်မဟုတ်သူများကဲ့သို့ အတိနမိတ်ကောက်ခြင်းများ၊ တချိန်လုံး နေကို ထိုင်ကြည့်နေခြင်းများ မပြုရပေ။ အစ္စလာမ်သည် ကမ္ဘာတွင်ဖြစ်မည့် အကြောင်းကိစ္စအားလုံးနှင့် ပတ်သက်၍ သက်ဆိုင်ရာ လုပ်ဆောင်ချက်များကို ချပြပေးပြီးဖြစ်ရာ ယင်းလုပ်ဆောင်ချက်တို့ကို အစ္စလာမ်ကိုလက်ခံထားသည့် မွတ်စ်လင်မ်တို့က ဖော်ဆောင် ကျင့်သုံးရပေမည်။ တမန်တော်မြတ် ဆွလ္လလ္လားဟုအလိုင်းဟိဝစလ္လမ်သည် နေကြတ်၊ လကြတ်ချိန်တွင် နမားဇ်ဝတ်ပြုတော် မူခဲ့သည်။ မွတ်စ်လင်မ်တို့အနေဖြင့် ဤအခြေအနေများ ဖြစ်ပေါ်နေချိန်တွင် တမန်တော်စွန္နသ် လိုက်နာကာ နမားဇ်ဆောက်တည်၍ အလ္လာဟ်ထံပါး ဒုအာပြုခြင်းသည် အလွန်သင့်တော် ကောင်းမွန်ပေသည်။ အဘယ့်ကြောင့်ဆိုသော် နေကြတ် လကြတ်ခြင်းများ ဖြစ်ပြီးပါက ရာသီဥတုဆိုင်ရာ ငလျင်ဆိုင်ရာ ဘေးထွက်ဆိုးကျိုးများ ဖြစ်လေ့ရှိသည်ဟု သက်ဆိုင်ရာပညာရှင်တို့က ဆိုထားကြ၏။ ယခု မွတ်စ်လင်မ်တို့အနေဖြင့် နေကြတ်နေချိန်၊ လကြတ်နေချိန်တွင် နမားဇ်ဖတ်၍ အလ္လာဟ်ထံပါးမှ ထိုဆိုးကျိုးများ မဖြစ်ပေါ်စေရန် ကင်းဝေးရန် ဆုပန်မည်ဆိုပါက မကောင်းပါ၏လော၊ ထို့ကြောင့် မွတ်စ်လင်မ်တို့အနေဖြင့် နေကြတ်လကြတ်ချိန်တွင် ဖတ်သင့် ဖတ်ထိုက်သည်ကို ဖတ်၍ တစ်ဖက်တွင် စွန္နသ်တော်တစ်ခုကို အကောင်အထည်ဖော်ခြင်းကို ကုသိုလ်ကို ရယူပါ။ နောက်တစ်ဖက်တွင် မိမိနေထိုင်ရာ နိုင်ငံနှင့် ပြည်သူပြည်သားများအား ရာသီဥတု၏ ဘေးအန္တရာယ်များ ကျရောက်ရခြင်းကနေ မိမိတို့၏ ဒုအာဖြင့် ကာကွယ်ပါ။ ယခု နေကြတ် လကြတ်လျှင် ဖတ်သည့် နမားဇ်နှင့်စပ်လျဉ်း၍ သိမှတ်ဖွယ်ရာများကို တင်ပြပါမည်။
(၁)၊ နေကြတ်၊ လကြတ်ချိန်တွင် နဖိလ်နမားဇ် နှစ်ရကအသ်ဖတ်ခြင်းသည် စွန္နသ်ဖြစ်၏။
(၂) နေကြတ်နမားဇ်ကို ဂျမားအသ်နှင့်ဖတ်ခြင်း၊ နေကြတ်ချိန် မတ်စ်ဂျိဒ်သို့သွားခြင်း၊ လကြတ်ချိန် တစ်ဦးခြင်း နမားဇ်ဖတ်ခြင်းတို့သည် စွန္နသ်ဖြစ်သည်။
(၃) နေကြတ်နမားဇ်အတွက် အဇာန်နှင့် အိကာမသ်ပေးရန် မလိုအပ်ပေ၊ လူအများစုရုံးစေလိုပါက “အဆ်ွဆွလားသု ဂျာမိအဟ်” ဟုပြော၍ ဖိတ်ခေါ်နိုင်ပေသည်။
(၄) နေကြတ်နမားဇ်တွင် စူရဟ်အရှည်များ (စူရဟ်ဗကရဟ်ကဲ့သို့) ကို တွဲဖတ်ခြင်း၊ ရုကူအ်၊ စဂ်ျဒဟ် ကြာရှည်စွာပြုခြင်းသည် စွန္နသ်ဖြစ်၏။ ကိရာအသ်ကို တီးတိုးစွာ ဖတ်ရမည်။ မွတ်က်သဒီများ စိတ်ငြီးငွေ့သွားမည်ကို စိုးရိမ်ရပါက အသံဖြင့် ဖတ်နိုင်သည်။
(၅) နမားဇ်ပြီးသည်မှ စ၍ နေကြတ်ခြင်း ပြီးဆုံးသည်အထိ အိမာမ်သည် ဒုအာပြုနေရမည်။ မွတ်က်သဒီများက အာမီးန်ဆိုရမည်။ ထိုသို့ ဒုအာတောင်းနေချိန် သက်ဆိုင်ရာ နမားဇ်အချိန် ကျရောက်လာပါက ဒုအာကို အဆုံးသတ်ပြီး အချိန်ကျသည့် နမားဇ်ကို ဆောက်တည်ရပါမည်။
(ကောက်နှုတ်သည့် ကျမ်း။ ဗဟစ်ရ်ှသီးဇေ၀ရ်၊ တွဲ ၁၁၊ စာ ၃၇။ အန်(န)၀ါရွလ်ကုဒူရီ၊ တွဲ ၁၊ စာ ၂၁၅။ သက်ဆိုင်ရာ ကျမ်းကြီးများကို ထိုစာအုပ်များမှ တဆင့်ကြည့်ရှုပါ။)
မှတ်သားရန်
နေကြတ်၊ လကြတ်ခြင်းဟူသည် အလ္လာဟ်အရှင်မြတ်၏ ကွဒ်ရသ်တော်တစ်ခုပင် ဖြစ်ပေသည်။ ထိုအချိန်တွင် မွတ်စ်လင်မ်တို့အနေဖြင့် နမားဇ်ဆောက်တည်ရမည်။ ဒုအာတောင်းနေရပါမည်။ အချို့ က ကိုယ်ဝန်ဆောင်များသည် နေကြတ် လကြတ်ချိန်တွင် ဘာမှမလုပ်ဘဲ ထိုင်နေရမည်။ တစ်ခုခု လုပ်လိုက်ပါက ကလေးကို ဘေးဥပဒ် သက်ရောက်သည်ဟု အယူရှိကြသည်။ အစ္စလာမ်တွင် ထိုသို့ယူဆချက်များ လုံးဝမရှိပေ။ အတိတ်နမိတ် ကောက်ခြင်းသည် ရှစ်ရ်က် အမျိုးအစားများထဲမှ တစ်ခုပင် ဖြစ်သည်။ နေကြတ်လကြတ်ခြင်းသည် အလ္လာဟ်ဘက်မှ ဖြစ်ပေါ်စေခြင်း ဖြစ်သဖြင့် မွတ်စ်လင်မ် အလ္လာဟ်ဘက်သို့သာ လှည့်ကြရမည်။ သဘောမှာ နမားဇ်ဆောက်တည်ရမည်။ ဒုအာပြုနေရမည်။ ကိုယ်ဝန်ဆောင်ရှိ်ပါကလည်း နမားဇ်ဆောက်တည်ပါ။ နဖိလ်၏ နိယသ်ဖြင့် မိမိရသည့်စူရဟ်ကို တွဲ၍ ဖတ်နိုင်ပါသည်။ နေကြတ် လကြတ်နေချိန်တွင် အလ္လာဟ်ဟုအပ်က်ဗရ်ကို ရွတ်ဆိုပါ။ ထိုသို့ဆိုရခြင်း၏ သဘောတစ်ခုကို ဖွင့်ဆိုရသော် ဤ နေ၊ လကြတ်နေခြင်းတွင် မည်သည့်စွမ်းအားမျှ မရှိ၊ အလ္လာဟ်အရှင်မြတ်သာလျှင် အမြင့်မြတ်ဆုံး စွမ်းအား အရှိဆုံးပင်ဖြစ်သည်ကို ဖော်ကြူးခြင်းပင် ဖြစ်၏။ နမားဇ်မဆောက်တည်နိုင်သူတို့သည် ဒုအာပြုနေလျှင် ရပေသည်။ နမားဇ်သည် နဖိလ်နိယသ်ဖြစ်၏။ စူရဟ်အရှည်မရသူများအဖို့ မိမိရသည်ကိုလည်း ဖတ်နိုင်ပါသည်။ မွတ်စ်လင်မ်တို့အနေဖြင့် စွန္နသ်တစ်ခုကို အကောင်အထည်ဖော်ခွင့် ကြုံဆုံချိန်ဝယ် ကုသိုလ်စ၀ါးဗ်ကို အမိအရ ရယူကြပါဟု အလ်မုဖီးဒ်မှ တိုက်တွန်းအပ်ပါသည်။
